De Siggi esch bei uns in Kapelle bekannt als talentierter Hobbykoch, mit re
Vorlieb fer HOT PEPPER, awwer ach als änner, der beim Schlachtfeschd
vum Gsangverein Uumenge Kesselflääsch verbutze kann. Es muss awwer
Koppflääsch sei wie Schniffel, Zung un Bäcklich.
Manschmol hotter awwer ach en Hääßhunger uff Spezialidäde aus de asiadische
Kich, do wu uff de Schbeisekaart ach Insekte wie Hääschrecke mit saumäßig
scharfe Soße aageborre werrn.
Kaum häwwich uff meine Biene-Webbseit e paar Rezepte mit Honig eigschdellt
khatt,
do hott der Schlitzohr per i-mäil folchendi Bschdellung bei mer uffgäwwe :

„ Hiermit bestelle ich 2 Dutzend frische Bienenhinterschenkel mit
Pollenhöschen vom Löwenzahn.
Die Lieferung soll am Mittwoch, den 1. April 2004 erfolgen und von SALVE
gegen 18 Uhr angerichtet werden“.
( gez. S.W.)

„A sou en windicher Seckel“, häwwich mer gedenkt. „ Wann der määnt, er
kännt mich in de Aprill schicke, dann horrer sich awwer gewaldich gschnerrt !
Jetzert werd de Schpieß umgedreht unn de Siggi griecht sei Bieneschenkelscher
mitsamt de Biene serwiert !“

Ich sammel also 24 doure Pollesammlerinne , die vor de Fluuchlecher
verklammt sinn unn bring se zum Salve, unserm Pizzabäcker vum Kapeller
Sporthaisel .

Der dud se uff ämme grouße Pizzadeller, schäi mit Honich unn Schneeglecklich
garniert,
em Siggi ufftraache, macht en Diener unn saacht:

„Wohl bekomm´s, mein Herr !“

Wanner jetzert määnen, de Siggi hett die Nas nuffgezoche, dann hänner eich
gewaldich gschnerrt :
Er nämmt Messer unn Gawwel, schpießt die erscht Bien uff, dunkt se in de
Honichdipp, schiebt die Bien in sei Maul, knaggt de Schitinpanzer vunn dem
Bienel unn verdreht die Ääche, wie änner, wu grad en Hummer verspeist.
Alle Schdammdischbrierer kummen ausem Schdaune nimmi raus;
de Siggi macht, ohne mit de Wimper se zucke, seeleruhich weirer, bis alle 24
Biene verdrickt sinn.

Dann nämmter die Serwiett, duppt sich sei Libbe ab, wie des vornehme Leit sou
machen unn määnt :

„ Kompliment, Salve !
Dei Bienekreation war nit schlecht.
Auße knuschbrich unn inne saftich. Awwer de Honich hettsch ruhich mit e
bissel Schilisooß uffmotze kinne !“

Wanner jetz froochen, wiesou die Biene inne saftich waren , dann häwwich do
blouß ää Erklärung :
Beim Druffbeiße sinn dänne Bienscher die Giftbloose geblatzt unn die Brieh
esch em Siggi vorkumme wie thailändischi Gewerzsooß.

( anm. des verfassers : die gschicht hot sich werklich sou zugetraache unn wer
se nit sou richtich glääwe will, esch selwert schuld ).