E außeramtlichi Feschtstellung

Am Stammdisch esch devu die Redd,
wer dann vun Gsetze Nutze hett,
wu sproochlich määnschdens sou vequer,
dass kaum änn Mensch im Bild mit weer.

„Die Gsetze nitzen“, wääß de Fritz,
„´s erscht mol em Staat, dann de Juschtiz,
 weil die, wu se gemacht mol hänn,
jo schließlich vun en lääwe wänn.“

VUN GSETZE LÄÄWE setzt voraus :
Känn annrer kennt sich mirren aus,
dann ´s weer nadierlich mäh wie bleed,
wann ach de Bircher ´s Gsetz vesteht !

Ma´ braucht drumääwe – gar kä Frooch-
Far ´s Gsetz e Art GEHEIMI SPROOCH,
e Sprooch, wu de gewäihnlich Mann
zwar lääse, doch nit fasse kann !

Un die erfindt mit Luscht un Lischt
En ausgekochter Altjurischt :
De Herr Geheimrat Quax vun Queitsch;
Er dääft se < BIRROKRATE-DEITSCH >.

Vun dem Moment a´ esch ( bis jetzt ! )
Die Sprooch uff alle Ämter Gsetz
Un jeeres amtlich Formelar
Esch alles annre, blouß nit klar !

Un unseränner steht devor
Wie seller Ochs voorm Scheierdoor !
Änn Trouscht : Veel efter als wie d´ denkscht
Blickt nit mol durch en Birro-Hengscht !

( von Gerd RUNCK, Zweibrücker Str. 11, 76829 Landau i.d.Pf.
  aus seinem neuesten Buch „E rundi Sach , Gedichteltes in Pälzer Mundart „ )